Nú leita vit eftir nýggjum projektum til 2011
Nú er tíðin komin til, at vit skulu finna eitt nýtt projekt at stuðla í februar 2011. Innsavningin av tímalønum í 2010 gekk yvir allan forvæntning. Yvir 100.000 kr. í tímalønum komu inn, sum allar fóru óskerdar til tey tvey projektini, sum vit valdu at stuðla í 2010 - Omman í Kambodia og 6 foreldraleys børn í Liberia.

Ein tími um árið...

Ása

Verð limur í okkara Facebookbólki, har eru javnan dagføringar og tíðindi verða kunnaði út tann vegin.

http://www.facebook.com/home.php#/group.php?gid=187312340598&ref=ts

Tvær verkætlanir fáa stuðul í 2010. Hetta er tann eina.

Vit vóna at nógv donerað eina tímaløn, soleiðis at vit kunnu stuðla hesum 6 foreldraleysu børnunum í Liberia við pláss á barnaheiminum hjá ABC barnahjálp, mati, skúlagongd og læknahjálp, um framt einum sjúkrarøktarfrøðingi at koma á barnaheimið.

Fjórð fátækasta landið í heiminum
Liberia var fyrr eitt av teimum londunum í Vestur Afrika, ið var best fyri. Men borgarakríggi frá 1989 – 2003 førdi tó við sær, at tað nú er fjór fátækasta land í heiminum.

25% av børnunum doyggja áðrenn tey fylla 5 ár
Livialdurin er 45 ár. 5,7 % av øllum kvinnum við barn, eru HIV smittaðar. Einans 32 % av fólkinum hevur atgongd til reint drekkivatn. 55% av monnunum og 81% av kvinnunum eru analfabetar. Landið er enn í sorli eftir borgarakríggi og bert fá børn hava møguleika at sleppa í skúla.

Børnini Abraham, Alucia, Anita, Edward, Emmanuel og Wilfred...
...eru fødd mitt undir borgarakrígginum í Liberia, sum endaði í 2003. Tey eru vaksin upp í einum krígsherjaðum landi, eru nú øll foreldraleys og hava tí ongan at hjálpa sær við basalum tingum, so sum mat hvønn dag, eina song at sova í, klæðir, læknahjálp og skúlagongd. Beint nú hjálpir ABC barnahjálp teimum, men av tí at tey ikki hava stuðulsforeldur, er ivasamt hvussu leingi hjálpin kann halda fram.

Mangla stuðulsforeldur
Uml. 50 børn í Liberia verða stuðla umvegis ABC barnahjálp í Føroyum. Hesi fáa bæði mat, læknahjálp og skúlagongd. Fleiri búgva eisini á barnaheiminum, sum ABC barnahjálp í Íslandi hevur bygt. Stuðulin verður fíggjaður við føroyskum stuðulsforeldrum, men nógv børn mangla stuðulsforeldur, millum annað vænta hesi 6 foreldraleysu børnini stuðulsforeldur.

Fígging til sjúkrarøktarfrøðing
Umframt at arbeiða fyri, at fáa stuðulsforeldur til tey nógvu fátæku børnini í Liberia og at byggja skúla har, fíggjar ABC barnahjálp ein sjúkrarøktarfrøðing, sum vitjar barnaheimið og skúlan við jøvnum millumbili.

Reglur fyri skúlan hjá ABC barnahjálp í Liberia
ABC barnahjálp hevur tilvitað valt, at helvtin av børnunum í skúlanum hjá teimum í Liberia, skulu verða gentubørn. Tey hava hinvegin einki aldursmark sett á, tí so nógv børn og ung eru, sum ongantíð hava gingið í skúla. Hesi skulu eisini hava ein møguleika, sigur Rúna Sivertsen, forkvinna í ABC har.

Kostnðarætlan
Tað kostar kr. 285 um mðr. at hjálpa einum barni við mati, skúla, læknahjálp og einari song á barnaheiminum hjá ABC barnahjálp í Liberia. Sjúkrarøktarfrøðingurin kostar um 1300 kr. um mðr., íroknað transport.

Eitt barn í 1 ár á barnaheimi, mat, skúla og læknahjálp 03.420,00 kr.
Eitt barn í 4 ár á barnaheimi, mat, skúla og læknahjálp 13.680,00 kr.

Sjúkrarøktarfrøðingur á barnaheimið í 1 ár 15.600 kr.

Ein tími um árið ynskir at stuðla ABC barnahjálp at hjálpa hesum 6 børnunum við mati, skúla, læknahjálp og plássi á barnaheiminum. Hvussu leingi vit kunnu hjálpa teimum, velst sjálvsagt um, hvussu nógvar tímalønir koma inn. Harafturat ynskja vit at verða við til at fíggja sjúkrarøktarfrøðingin í eina tíð. Verður undirtøkan góð, verður peningurin brúktur til at hjálpa enn fleiri børnum og møguliga at stuðla útbygging av skúlanum.